Uppalangalil uzhaipaalargal

   

     

கடும் வெயில் !

கதிரவனை 

கடிந்துரைத்த  படியே 

குடைக்குள்  நான்,

கால்கள் சற்று  தூரம் பயணிக்க 

பின் 

கண்டேன்:

உரிந்த தோல் கொண்ட 

உள்ளங்கைகளும்

வெந்திருந்த பாதங்களும்

வியர்வை சிந்தியபடியே

உப்பளங்களில் 

உழைப்பாளர்கள்,

"வாழ்வாதாரம் தரும்

வெயில் வாழ்க "என்றனர்

காயங்களாக்கிய 

கடும் வெயிலை 

கைகூப்பி வாழ்த்திய 

கரங்கள் கண்டபின்-

குடைக்குள்  சுட்டெரித்த வெயில் 

ஏனோ

குளிர்வது போல் இருந்தது

குடையகற்றிய பின்னும் !

கதிரவனை கடிந்துரைத்த

குற்ற உணர்வுடன் -என்

கால்கள் நகர்ந்தன அங்கிருந்து!

-வி. ஆஷாபாரதி